Afdelingsleder "Ivik"

Utoqqaat illuat Ajarsivasik puigortunngortunut immikkoortortami Ivimmi aqutsisussarsiorpoq

ALLAGARSIUTEQQITAQ:

Atorfinittussa marts ulluisa aallaqqataa 2026 imaluunniit erseqqinnerusumik isumaqatigiissuteqarnikkut atorfinittussamik.

Utoqqaat sullikkusuppigit, qanimut qanigisaat oqaloqatigisarlugit? Inuttut nukissaqarluarpit nuannaartuullutillu, nammineq piginnaasannik atorluaasinnaallutit, utoqqaat pitsaasumik isumassorsinnaavigit paaqqutaralugillu? Kiisalu suliamik ilinniagaqarsimanngitsunut pikkorissaasartutut / aqutsisutut imminut takorloorsinnaavit? Taava immikkoortortami aqutsisussatut periarfissaqarluarputit.

Ajarsivasik pillugu

Utoqqaat illuat Ajarsivasik Kommune Kujallermi utoqqaat illuisa ilagaat Qaqortumilu illuni.

Utoqqaat illuat pingasunik immikkoortortaqarpoq, paaqqutarinniffiit marluk kiisalu puigortunngortunut immikkoortortaq ataaseq, Ajarsivasik katillugit 48-nut inissaqarpoq. Puigortunngortunut immikkoortortaq Ivik 11-inut inissaqarpoq. Immikkoortortat allat marluk 18 aamma 19-inik inissaqarput.

Ulloq unnuarlu angerlarsimaffiuvugut taamaammallu suleqatigiiaat pingasuiit paarlakaallutik sulisarput. Utoqqaat Illuanni sulisut ilaatigut makkuninnga ilinniagaqarput: peqqissaanermut assistenti, peqqissaanermi ikiortit, peqqissaasut aammalu ilinniarsimanngitsut arlaqartut. 

Atorfiup imarisai:

Immikkoortortami aqutsisumik utoqqarnik sullissisussamik, pitsaasumik isumassuisumillu paaqqinninnermik taassumalu ineriartortinnissaanik pingaartitsisumik pissarsiorpugut.

Ineriartorfimmiippugut, piginnaasaqarneq, sulinermut kajuminneq, aalajaatsuuneq kiisalu ataqatigiinneq eqqumaffigerusullugit, isumaqaratta taakku ineqartut atugaannut toqqaannartumik sunniuteqartuusut. Taamaattumik kissaatigaarput sulineq, suliaqarfiit allat peqatigalugit, nutaaliorluni ineqartunullu ineriartorfiusumik ingerlassasoq.

Pingaartumik pissaanermik atuisariaqalernissaq pinaveersaartitsinikkut pinngitsoorniartarparput.

 

Naatsorsuutigaarput illit:

• Sundhedsassistentitut imaluunniit peqqissaanermut allamik naleqquttumik ilinniagaqarsimasutit, aqutsinermik misilittagaqarlutit.
• Utoqqarnut sullissivimmi sulerusuttutit soqutiginnittutillu
• Aqutsinermi suliassanut peqataanissamut piginnaasaqarlutillu piumassuseqarnissat
• Angerlarsimallutit suliartoqquneqarnissamut piareersimasinnaasutit
• Marluinnik oqaaseqartuusutit, kalaallisut qallunaatullu, tamannali piumasaqataanngilaq.
• Allanik suliaqarfinnik suleqateqarnissamut piginnaasaqarluartuunissat
• Paaqqutaqarnermik inerisaaqataarusullutillu allaganngortitseqataarusuttutit
• Pikkorissaanermut peqataarusuttutit, suliffimmik misiliisunut ilinniartunullu ilinniartitserusuttutit
• Illumi pissutsinut pitsaasumik, nutaaliornermik, isumassarsiornermik ineriartortitsinermilu sunniuteqaqataajumasutit.
• Namminersorlutit sulisinnaasusi, akisussaassuseqartusi sullissiumatuujullusilu

Neqeroorutigaavut:

• Atorfik suliap imarisaanik nammineerluni sunniuteqarluarnissamut periarfissalik.
• Ulluinnarni piffissat suliffiusut 8-16
• Illu suliffik, illumi najugaqartut, suleqatit suliffigisassarlu pillugit paasissutissanik tuniorarluarneqassaatit.
• Assigiinngitsunik suliaqarneq, suliassat pissanganartut, suleqatit illumilu najugaqartut peqatigalugit nuannersunik misigisassaqarnissaq periarfissaalluarput.
• Suliffik ataqqinninnermik, akisussaaffimmik ilinniarnermillu aallussiviusoq
• Nalunaaquttap akunneri 40-t suliffiusarput

Akissarsiat atorfeqartitaanermilu atugassarititaasut:

Kalaallit Nunaanni Namminersorlutik Oqartussat kattuffiullu allap isumaqatigiinniarsinnaatitaasup akornanni isumaqatigiissut atuuttoq naapertorlugu akissarsiaqartitsisoqarlunilu atorfinitsitsisoqassaaq.

Atorfimmut atasumik inissaqartitsisoqarsinnaavoq, malittarisassat qaqugukkulluunniit atuuttut naapertorlugit qularnaveeqqut/attartornermut akiligassat akilerneqassallutik. 

Inissaqartitsisoqarsinnaavoq malittarisassat atuuttut naapertorlugit akilerneqartartussamik. Malugeqqussavarput sulisutut inigisamut utaqqineq sivisummat, sulisumut inissamik neqerooruteqartoqarpat atorfininneq atuutilersinneqarsinnaavoq.

Atorfinitsinneqartut qaammatini pingasuni misiligaassapput.

Atorfik pillugu sukumiinerusumik paasissutissanik pissarserusukkuit Utoqqaat illuata pisortaanut saaffiginnissinnaavutit pisortaagallartoq Aka Motzfeldt akmo@kujalleq.gl

Qinnuteqaat pillagaasimannginnermut uppernarsaat, ilinniagaqarsimanermut paasissutissat suliffigisimasallu nalunaarsornerat soraarummeersimanermit uppernarsaatit assilineri il.il. PDF-filinngorlugit kommunip nittartagaatigut tunniunneqariissapput kingusinnerpaamik februaarip ulluisa arfineq pingajuat 2026

MALUGIUK: Qinnuteqaatit pappilissatigut e-mail-ikkulluunniit tiguneq ajorpagut, inussiarnersumik qinnuteqaatit PDF-fil-inngorlugu nittartagaq aqqutigalugu nassiunniunneqassapput.

”Inuit peqqinnerulernissaat aallukkumallugu kommunimi sulinerup nalaani pujortartoqartannginnissaa Kommune Kujallermiit atuutsinneqalerpoq. Tamanna 2018-imi ukiortaamiit eqqunneqarpoq. Paasissutissat sukumiinerusut pissarsiariumagaanni Sulisoqarnermut Immikkoortortaq attavigineqarsinnaavoq”

 

Qinnuteqarnissamut killissarititaasoq: februaarip 7.-at, 2026

Atorfik una qinnuteqarfigiuk