Sanaartornermi Ingeniøri

Sanaartornermut ingeniøri

Nunatsinni kommunit kujallersaanni Teknikkimik Avatangiisinillu Ingerlatsivimmi sanaartornermut ingeniøritut atorfik sanaartornermut ingeniørimik kajumittumik inuttassarsiorneqarpoq. Atorfik inuttassarsiorneqartoq aggustip ulluisa aallaqqaataa 2025 aallarnerfigalugu isumaqatigiissuteqarnikkulluunniit inuttalerneqassaaq.

Kommunimiipput illoqarfiit pingasut, Qaqortoq, Narsaq Nanortalillu, nunaqarfiit aqqanillit kiisalu savaateqarfiit nunaateqarfiillu 37-t - innuttaasut katillugit 7.000-it missaanniillutik. Sanaartornermut ingeniøri Kommune Kujallermi inissianik attartortakkanik inuussutissarsiornermilu illuutinik ingerlatsinermi, aserfallatsaaliuinermi nutarterinermilu pingaarutilimmik inissisimasussaavoq. Innuttaasut pitsaasunik ullumikkumullu naleqquttunik ineqarnissaat kissaatigaarput.

Sanaartornermut ingeniørip INI A/S-i ulluinnarni ineqarnermi sullissisuusoq aammattaaq inuttaasunut attaveqartuusoq qanimut suleqatigisussaavaa. Sanaartornermut ingeniøri kommunep inissiaataanik aserfallatsaaliunermi nutarterinermilu akisussaasuussaaq. Kommunimi inissiat 700-t missaat INI A/S-imit ingerlanneqarput.

Ingerlatsivik teknikkimut pisortamit siulersorneqartoq arfinilinnik teknikereqarpoq pingasunillu allaffimmioqarluni.

Makku suliarisassavatit:

• Sanaartugassat
• Kommunip illuutaanik nakkutilliineq pilersaarutaasullu malillugit aserfallatsaaliineq (PPV).
• Nutarterisoqarnerani sanaartortoqarneranilu aningaasatigut aqutsineq nakkutilliinerlu.
• Ingerlatsivimmi suliassat assigiinngitsut.
• Suliassat takkuttut suliarineri.

 

Naatsorsuutigaarput illit:

• Naapertuuttumik ilinniagaqassasutit, sanaartugassalerinermut siulianilu suliassat eqqaaneqartut misilittagaqarfigissagitit.
• Namminersorlutit aaqqissuulluakkamik sulisinnaassasutit.
• Sullissiumatuujussasutit suleqatikkuminarlutit qiimasuullutillu.
• Suliassat suliarinerini isumassarsiullaqqissusermik pitsaassusermillu takutitsisassasutit.
• IT-mik atuisinnaassuseqassasutit, matumani AutoCad-ip nalinginnaasumik atorsinnaanissaa.
• Titartakkatigut, allakkatigut oqalunnikkullu erseqqissumik siumullu takorluuisumik saqqummiussisinnaassasutit.

Ilinnut neqeroorutigisinnaasavut:

• Kommunimi illoqarfitsigut annertuumik ineriartorfiusumi sulineq soqutiginartoq.
• Suliffik pikkunartunik suliassaqarfiusoq.
• Inuttut suliatigullu ineriartornissamut periarfissat pitsaasut.
• Suleqatit suleqatigiinnerlu pitsaasut.
• Kalaallit Nunaanni nunami kulturikkullu soqutiginaateqarnerit alutornaateqarnerit ilaanni pinngortitami misigisassat sunngiffimmilu sammisassat.

 

Aningaasarsiat atorfeqartitaanermilu atugassarititaasut

Naalakkersuisut aammalu atorfinittussap kattuffiata isumaqatigiissutaat naapertorlugit atorfinitsitsisoqarluni akissarsiaqartitsisoqassaaq.

Atorfimmut atasumik inissaqartitsisoqassaaq malittarisassat atuuttut malillugit sillimmatinut ineqarnermullu assigiinngitsunullu akiliuteqarfitgineqartartussamik.

Atorfinittussap ilaqutaasalu atorfininnermut atatillugu angalanermut nutsernermullu aningaasartuutaat kommunimit isumagineqassapput.

Paasissutissat allat

Atorfik pillugu paasissutissat sukumiinerusut perusukkaanni Sanaartornermut pisortamut Josef Kreutzmannimut saaffiginnilluni pissarsiarineqarsinnaapput, oqarasuaat +299 64 82 42 imaluunniit e-mailjokr@kujalleq.gl.

Qinnuteqaat, pineqaatissinneqarsimannginnermut uppernarsaat, ilinniagaqarsimanermut paasissutissat suliffigisimasallu nalunaarsornerat kiisalu soraarummeersimanermit uppernarsaatit assilineri il.il. PDF-filinngorlugit kommunip nittartagaatigut nassiunneqariissapput kingusinnerpaamik  juunip ulluisa 20-anni 2025.

MALUGIUK: Qinnuteqaatit pappilissatigut e-mailikkulluunniit tiguneq ajorpagut, inussiarnersumik qinnuteqaatit PDF-filinngorlugu nittartagaq aqqutigalugu nassiunniunneqassapput.

”Inuit peqqinnerulernissaat aallukkumallugu kommunimi sulinerup nalaani pujortartoqartannginnissaa Kommune Kujallermiit atuutsinneqarpoq. Tamanna januaarip aallaqqaataani 2018-imi atuutilerpoq. Paasissutissat sukumiinerusut Sulisoqarnermut Immikkoortortaqarfimmut piniarneqarsinnaapput ”

Qinnuteqarnissamut killissarititaasoq: juunip 20.-at, 2025

Atorfik una qinnuteqarfigiuk