Teknikker til Kommune Kujalleq

Teknikkimut Avatangiisinullu Ingerlatsivimmut sanaartukkanut pisortamik

Kommune Kujallermi Ineqarnermut, Teknikkimut Avatangiisinullu ingerlatsivik Qaqortumi Sanaartukkanut pisortatut atorfik piaarnerpaamik inuttalerniarneqarpoq. Decembarip ulluisa aallaqqaataa 2025 isumaqatigiissuteqarnikkulluunniit. Qinnuteqartoq naleqquttoq Teknikkeqarfimmi pisortap tulliatut atuutilersinnaavoq.

Ingerlatsivik teknikkimut pisortamit siulersorneqartoq 10-inik teknikereqarpoq pingasunillu allaffimmioqarluni.

Qulequttat tullinnguuttut akisussaaffigilissavatit:

• Kommunimi sanaartukkatigut suliat aqunnissaat. Aningaasaliissummiit inaarutaasumik sanaartukkanut naatsorsuutit tikillugit.
• Pitsaassutsimik qulakkeerinninneq/suliarinnittussarsiuussisarneq isumaqatigiissusiortarnerillu qulakkeernissaat.
• Sanaartugassanik aqutsineq, ilaatigut PPV (illuutit piffissap ilaani pilersaarutaasumik aserfallatsaaliorneqartarnerat) pilersinnissaat/suliarinissaat.
• Kommunip illuutai.
• Nutarterisoqarnerani sanaartortoqarneranilu aningaasatigut aqutsineq nakkutilliinerlu.
• Ingerlatsivimmi suliassat assigiinngitsut.
• Qinnuteqartoq naleqquttoq Teknikkeqarfimmi pisortamut tullersortinngussaaq.

Naatsorsuutigaarput:

• Naleqquttumik ilinniagaqarsimassasutit, ajornanngippallu suliassaqarfiit ilaat misilittagaqarfigissagitit.
• Aqutsinikkut misilittagaqartuuneq annertuumik iluaqutaassaaq.
• Namminersorlutit aaqqissuulluakkamik sulisinnaassasutit.
• Sullissiumatuujussasutit suleqatikkuminarlutit qiimasuullutillu.
• Suliassat suliarinerini isumassarsiullaqqissusermik pitsaassusermillu takutitsisassasutit.
• Qarasaasianik atuisutut nalinginnaasutut atuisinnaasutit (iluarsaassutit allassutillu, AutoCad imaluunniit MapInfo.).
• Titartakkatigut, allakkatigut oqalunnikkullu erseqqissumik siumullu takorluuisumik saqqummiussisinnaassasutit.

Ilinnut neqeroorutigisinnaasavut:

• Kommunimi illoqarfitsigut annertuumik ineriartorfiusumi sulineq soqutiginartoq.
• Suliffik pikkunartunik suliassaqarfiusoq.
• Inuttut suliatigullu ineriartornissamut periarfissat pitsaasut.
• Suleqatit suleqatigiinnerlu pitsaasut.
• Kalaallit Nunaanni nunami kulturikkullu soqutiginaateqarnerit alutornaateqarnerit ilaanni pinngortitami misigisassat sunngiffimmilu sammisassat.

Akissarsiat- atorfinitsitaanermilu atugassarititaasut

Isumaqatigiissutit atuuttut naapertorlugit atorfinitsinneqarneq akissarsiaqartitaanerlu.

Atorfimmut atasumik inissaqartitsisoqassaaq malittarisassat atuuttut malillugit sillimmatinut ineqarnermullu assigiinngitsunullu akiliuteqarfigineqartussamik.

Paasissutissat allat

Kommunaldirektør Atorfik pillugu paasissutissat sukumiinerusut pissarsiarineqarsinnaapput pisortaaneq Hans Jørgen Mørch mailikkut saaffigalugu: hjmo@kujalleq.gl imaluunniit Teknikkimut Avatangiisinullu pisortaq Malik Lundgaard Jensen mlma@kujalleq.gl saaffigalugu.

Qinnuteqaat, pineqaatissinneqarsimannginnermut uppernarsaat, ilinniagaqarsimanermut paasissutissat suliffigisimasallu nalunaarsornerat kiisalu soraarummeersimanermit uppernarsaatit assilineri il.il. PDF-filinngorlugit kommunip nittartagaatigut nassiunneqariissapput kingusinnerpaamik novembarip ulluisa arfineq sisamaat 2025.

MALUGIUK: Qinnuteqaatit pappilissatigut e-mailikkulluunniit tiguneq ajorpagut, qinnuteqaatit PDF-fil-inngorlugu nittartagaq aqqutigalugu nassiunniunneqassapput..

”Inuit peqqinnerulernissaat aallukkumallugu kommunimi sulinerup nalaani pujortartoqartannginnissaa Kommune Kujallermiit atuutsinneqarpoq. Tamanna 2018-imi januaarip aallaqqaataaniit eqqunneqarpoq. Paasissutissat sukumiinerusut pissarsiariumagaanni Sulisoqarnermut Immikkoortortaq attavigineqarsinnaavoq”

Qinnuteqarnissamut killissarititaasoq: novembarip 9.-at, 2025

Atorfik una qinnuteqarfigiuk